Beskjæring av ripsbusk, forsøk 1

Leikehagen har buskar også! Rettare sagt - maaaange buskar og mykje buskas. Nokre er planta av tidlegare eigarar og andre har nok funne vegen dit sjølv. Etter nærare kartlegging har eg funne fram til bærbuskane våre. To av dei veit eg er rips, for vi har nydt godt av store mengder raude, syrlege bær som smakar rips (ergo konkluderer eg med at det er det det er). Ein busk er stikkelsbær - der har eg ein gong funne to sure stikkelsbær. Den siste busken trur eg også er rips, men han har vorten fullstendig skjult av dei usympatiske parkslireknene, så eg har aldri fått bær på han.

Når desse buskane vart planta, veit ingen, men dei såg gamle ut då vi flytta inn i 2009. Etter dette har ingen beskåre dei, og no er det vel på tide?

Vår - nytt liv!

Våren er den finaste årstida - det er så optimistisk å sjå at plantane vert vekt av dvalen, så fantastisk å sjå dei fargerike blomane trenge seg opp av den grå og brune bakken, eller rett gjennom snøen!

Parkslirekne-spøkelset

Dei siste dagane har det gått opp for meg - uvitande amatør - at dei litt voldsomme bambusliknande vekstene bak huset er PARKSLIREKNE! Forøvrig eit plantenamn eg aldri har høyrt før, og slit med å både hugse og uttale, men det er altså det det er.

Det føles som om vi har fått ein diagnose på eit litt irriterande utslett, og så viser det seg at det er svartedauden sjølv som har banka på.

Den optimistiske våren!

Frå og med i dag trur eg på han - våren. No kjem varmen smygande, no kjem lyset nærare. Dagane vert lengre, og smyg seg nesten inn under huda mi, og eg kjenner det: Livskrafta, optimismen, gleda.

Dei siste dagane har eg tatt runder rundt huset for å sjå etter vårteikn, og sjå kva eg fann heilt inntil muren i dag: hagens første krokus! Dette er optimisme på høgt plan!

Slik er hagen per i dag - februar 2013

Her er nokre bilete av huset og hagen. Typiske før-bilete: før-våren-kjem-bilete, før-arbeidet-startar-bilete, før-frustrasjonane-set-inn-bilete, før-vi-ser-at-vi-ikkje-rekk-halvparten-av-det-vi-vil-bilete og før-vi-legg-oss-langflate-og-ler-av-oss-sjølve-fordi-vi-ser-at-vi-har-tatt-vatn-over-hovudet-bilete. Enjoy:

Blomar i hagen - bilete frå juli 2010

Ein stor kvit rhododendron

I 2010 tok eg med meg kameraet ut i hagen og tok bilete av nokre av blomane eg såg då. Her er samlinga. Forrige veke gjekk eg gjennom bileta, og no trur eg eg har kome opp med sånn ca riktige namn på dei ulike aktørane her.

Det er supert om du legg att ein kommentar i kommentarfeltet dersom du ser noko som ikkje stemmer, eller om du har anna hagekunnskap å dele!

Ny med hage, ny med blogg.

I dag kastar eg meg ut i det!
Eg er ikkje så ny med hage, men no - etter å ha budd her i snart fire år - skal eg endeleg sleppe hemningane og tørre å utforske litt. Blogging, derimot, er eg heilt ny med. Dette vert eit spennande prosjekt! Eg kastar meg uti det, let alle (nesten) hemningar fare, og satsar på prøve-feile-metoden på begge felt.